حال دواري...

Ahmed Naciri

*****

.......حال دواري...
مال حال دواري تبهدل
واش بداتو سوسة الذل
وخلات لي مشى منو
ما باقي يرجع ليه....
.....
ما بقى لداك الزرع لمسبل
حصاد بالتباندة والمنجل
من يدو الغمرة يلاوح
والمط الشمس تتكرمل فيه...
....
فين الدرسة والرحبة والسكل
والعشور بالبركة ينزل
وصابتنا فرينة و شعير
والقمح المطمورة تقبل عليه...
.....
فين بكرنا لي كان سارح و مطول
وسط زنيكة نوارها يهبل
والرواب ما يخطانا
وشكوتنا جلد و لبنها تعطيه...
....
فين قلوشة سمن حار تحت الرحل
وسط صندوق مسورتة بقفل
نهار الميمة تفتحها
من البعد بنيفك تشميه...
.....
فين كانوننا لي كان يشعل
ولون الكشينة لي كان كحل
والغلاي ماه يبربر
بالجمر أتاي يطلع عليه...
.....
فين الهارون و فقيهنا يهلل
وفين الشفار فسوقنا يحصل
فين كنورنا لي كان تبن
المخصوص منو يجي وجدي يعطيه...
.....
مال حال دوارنا تبدل
ماضيه طاح في بير و عليه نطل
دابا عقلي حار
واش التقدم أو الثرات ل فرطنا فيه...
....
بداها من الجار ديما مشكل
وللحق بين الجيران راه تخبل
ما بقات محبة
والفرض والسنة تحجبات عليه...
....
الفقير زاد هزل
والغني طغى وهبل
مابقى صواب
أنا نهديه ولي عمى نمشي ونخليه...
.....
............أحمد الناصري.......