السبت، 24 نوفمبر 2018

قشابة على أدبا

★ قشابة على أدبا ★
بعد الاستاذ محمد بلحاج و عراضة البابوش جاء الدور على اخي و صديق المحبوب الشاعر و الزجال الرائع *إدريس جبيلو*
****★****★****★****★****★****★****★****
گْلَسْت ف قهوة و ف يدّي سْتِيلُو
قُلتْ أَجِي آش نْدِيرُو
طاح ف راسي ادريس جبيلو
و قشاشبي ما يلبسها غِيرُو
گُلت نكتب فيه مقالة
تجمع نسوة و رجالة
نقشّب و نْرَدُّو حَالة
و نسمع ردّ نْفِيرُو
كتبت لو أنا رسالة
جاني يجري بعُجالة
5 دقايق كيف البالة
من الباب نسمع صْفِيرُو
شاف يْمين و شاف شْمال
بحال يلا تالف لو الخيال
على جنب مايل ميَال
قريب يزحف على ظهرو
شافني شاد ركينة
گال هاذي همزة سمينة
ف يزيد ندير روينة
مثالو غشمان ما يَدْرُو
جاني كاحز ماشي
مْعَنگر طربوش بالشاشي
طلب فطور و بّاناشي
و زاد قهوة و باكي گارو
انا طالب قهوة كحلة
كي يَّامي سودا زحلة
ولايْنِي هذي وحلة
مع جبيلو واش نديرو
گلسنا ساعة و دقايق
جبيلو... بان لي فايق
بغا يدير عليا عايق
و يدق فيا مسمارو
و راسي طايب مطارق
على القوالب كنتسابق
اليوم ... ندير لو لابق
يتلفو على دوَّارو
لما شفت اللبن حماض
ما ينفعني معه غِ الخواض
درت السبة بالمرحاض
و طرت كِيف اللي طارو
خرجت من الباب الورَّاني
و تركت جبيلو وحداني
هو ف القهوة برَّاني
و گاع الناس له يشِيرو
دازت على غيبتي ساعات
يقول وحدو واش يزيد مات
ناض قلَّب ركاني و قنات
و ما لقاني بجوارو
بقى گالس حتى طاح الليل
جِّيب خاوي و الصرف قليل
و جبيلو ما عندو بديل
راه دارها ليه شوارو
قْهَاوْجِي بغى يسد القهوى
ما بقى شاشي و لا نخوة
ناري واش هاذ البلوة
الگارصون رايد يجارو
جبيلو قاسو بو تفتاف
يگمگم و يضرب ف الكتاف
القهاوجي يسحبلو خطاف
عيَّط لصحاب نصارو
هذا يجر هذا ينتف
شي يركل و شي يشتف
و جبيلو يرغب و يحلف
خدا المنقي بخيارو
ادريس كلا ما كال طبل
حصلة و عليها يعقل
بلا تقرقيب حط سطل
و عاد لدوارو في كارو
هاذي مزحة يا لحباب
ادريس خويا من عز صحاب
ما تقولوا عليا كذاب
هذا يزيد و بشارو
كل يوم نجيب حكاية
خالية نميمة و وشاية
بغيتكم تضحكو معايا
و كلها يشاور لعشيرو
بغيتك ادريس تسمح ليا
راك صاحبي عزيز عليا
قصيدتي ذكرى و هدية
و ما حلا جبيلو و شعارو
بكل حب و تقدير لك اخي ادريس جبيلو
و انتظروني في فقرة اخرى من
★ قشابة على أدبا ★
يزيد علوي اسماعيلي
مرسلة بواسطة في

ليست هناك تعليقات:

إرسال تعليق

الاشتراك في: تعليقات الرسالة (Atom)