هضرة من الگلب

Mohamed Hadiche

****************
tag

هضرة من الگلب
*****************

گال گوالي هضرة من الگلب

عبارها زرع وغبارها معنى

كولها شاد اللجام سايگ

معيط العلام عافط جرى

الحق تغرب ف زمان تلف

قلبت عليه ف ضو الگمرة

ؤبان ليا خيالو مشموت

ملجم بصريمت شوك الدرگ

تلهفت نشم ريحتو ف حلمة

مطرزة برشمان حرير مبهج

ؤمزوقة لوبان مبخر عنبر

هلل الفجر ف لليلة البدر

توجع اليوم معصر گطران

ضوا النهار بالظلام الباطل

نطح العادي ؤالبادي مكر

مكين غير شتف هايشتف

دردك بگرون التيران سخط

البروان ترفس تگلع من الجدر

غلفني الزمان نتفني ريش

شفت الكيادر سربة بلا علام

والديب سراح النعاج فارس

حر الضيم تحلقم مقجوج

تهد كلامي يوصل للسبع

لي ف الجهد تزمم من الگلب

دمي تحرگ عذاب ؤتقهر مرار

وياسي ما تقطع يحن يحن

سرحوني الخوت حصير الدوم

كالو خير تمري ورماوني عضم

الخاوا تغربات بالطمع مخلوض

وتقلبات المحنة قطيع مقزضر

تقليت بضرهم عوافي تگدي

وسلمت احسرتي لربي العالي

يالليام مالكي سوايع بدالة

ضحكة منك يتحلحل الطمع

ويفيق رگاد النعاس المشبوح

منشور گنازة طول ف عرض

مغندر بهياضر المطحون غدر

توحش وحشي خبار تفرح

نشوفني راسي مگمح صوالد

ف هوتا حرگات دارت جوانح

طارت ؤعلات ف سما المكتوب

غطاني قنعي من طمع النفس

حيت الهدية من الأصل مجدر

بريحت دوك الجدود المرابط

أهل الكرامة والتاريخ المعطر

من ديك الشجرة غرسي ورق

بقلم محمد حديش
م͠ج͠د͠و͠ب͠ آ͠ل͠ح͠رف͠
05\12\2018