Med Zerouani
***********
بعد ازند فيا الحال
...
زندة علا زندة
حتى طاب الحال
ف الخاطر ما بقا أصبر
علا ودني سمعت
شلا كلام
بين السمع ؤ لبصر
سار لخصام
قالت لودان للعين
سيري يا قليلة الجدى
يا مولات الحاجب ؤ لشفار
ماتصوني عاهد ما فيك أمان
ف لمح لبصر تغيير الشهادة
ؤ تزين لكلام
جاوبت العين ف خير جواب
قالت انا منحني الخالق خير مكان
فوسط كحال العين أعطاني نور
لبصار
ما نتخطى عتوب ما نجبد عار
للحق نسبح ونصلي عل الدوام
وانت يا لودان تسمعي الحق
ؤ ف طريقك يشهد اللسان
وشحال من قوال غيرتي
بلا عداد
ما انت ف راحة ولا
آمان من الطرح قيادة شلا نار
ازعف اللسان ونطق حزين
صليو على النبي يا عشران
الصلاة علينا فرض ربي أمر
بقول لحسان
سمعو يا فاهمين يا سكان
هاد الجخ هجرو لخصام
ياك حنا خاوة ساكنين هاد لمكان
زاد القلب يبكي حزين
انا مول الصبر جهدي مغبون
نعطي كل واحد حقو عل الدوام
ما نتأخر ما نعكز ديما متهوم
ؤ حالي قليل نعاس
نسمع شلا معاير ؤ صبري فات لقياس
اليوم شلا جنون مني خرجو
هدا حد لكلام
يا طرافي سمكم فيا حايل
من زمان فيا يغتال
ما ننكر شهادة يوم القيام عسير
انخاف لعداب
سمعو النصيحة يا جهال
يا لي ما فيكم حيا ولا صواب
ربي وصى بسابع جار
وانتومة جيتو لهاد الكسدة خوان
بالمهل نطقات الخاطر
بعد نشوف لطبيعة تتسد لنفاس
مال الدم جريح اليوم سار فيا لغيال
انا لي كنت مولات العز بيكم نتباها
بخير كلام
اليوم عجاج لغيار عماني
عدت في الجخ مملوكة ما جايبة خبار
على دنبي سايرة نطلب العالي الغفار
يعفو عليا من هاد الحال
انعود للخالقني هو القاهر الجبار
أما أنت يا ذاتي عالم بيك غير التواب
صوني العاهد ؤ فصلي بين لخيار
بقلم الشاعر الزجال : محمد زرواني
ليست هناك تعليقات:
إرسال تعليق