سولوني

‎الإدريسي رحال‎

*************

سولوني كيفاش تكون مجدوب
تلبس العفه تدور فلحضرة
تكون محمول على جناح الحرف
تكون محمول فنعشك حي مركوب
سولوني كيفاش تلبس لقصيده
سولوني كيفاش تقطر منك دم
سولوني كيفاش تعرگ اتحرگ تبرگ
تبرگ شمسك ف ارضك ف لحمك
كيفاش تضوي فظلام الوجد
كيفاش تضوي فظلام العهد
كيفاش يكون الفتح يبان مخ لعظام
كيفاش تسافر مكة لقصيدة ف نيام
كيفاش تتزمزم بلحرف بلقصيدة عام
كيفاش تتكلم تدوي يخرج لكلام
كيفاش تكون انت السربة و العلام
كيفاش تكون مهبول و لعقل بتمام
كيفاش يكون الجسد فرخ مدبوح
و القلب طاووس ب ريش النعام
كيفاش يتسرى بك و نت نبي لكلام
كيفاش ترحب سمات لقصيدةتزحام
يسمعوك ملايكة الروح يهزو لعلام
روحك حروف والجسم قصيدة خام
يتقب حرفك بركان الذات كلها رخام
العين تشوف جوفك يا شيخي
تدمع الحجرة و يحن ضرع لغرام
تذوب كل قصة بين ليلة و ليلة
تهرس حيوط عاندت الف عام
تخمر الكسدة وسط صهد الباطل
تترطى ف الحق مذبوحة لسلام
تصوم غوت الغوث مللي تشرب
من الحضرة المحجوبة بصمام
يفيق وجع الدفينة ف جواها
تمة تقوم لقصيدة روح ب لمقام
تزور كل روح نبوة الحرف ايام
تتحنط ف ضو مقامو تجيه لخيام
ف موسم لحروف تذبح كبش لكلام
من زريبة لمحبة تذوق المعنى هيام
آجي يا شيخي بخ ف لقلم و الورقة
يتزمم الحرف من دم اسماعيل قلام
تجي لقصيدة ضحية تسلم السلام
سولوني كيفاش تكون المجدوب
تتلحف لقصيدة حيى و لقلم عريس
ف زواج نزف مدادو ف تاريخ لانام
كتب لعقد و لعدول واقع يزمم زمام
نشم ريح الحق من ورا بحر الحرف
و الظلم يظلم مهوش مخمور لظلام
نكتب بگطران العرعار ريشة رسام
نكتب ف الما يقراني نكتب عليه
يا قاري الحق تتجاهل خوك حرام
نكتب على زربية لبحر تهدا لمواج
نكتب على سراب ف حر صيف رام
يجمع ماه حرير يكفن لغذر بلعرام
نكتب السكات على ورقة قلبي
و نربط لساني نعقد عليه لكمام
ملي نشوف الضحكة مجموعة
و نشوف شيخي يحرم لكلام
ندوي ف صمتي المغلغل داوي
يفجرني نقنبل فتيلتي داخل ظلام
ملي نشوف شيخي باع حرفو قام
ندفني ف مدادي و نصلبني بسلهام
نتغنس ف قب قبي نتلحفني سواد
نخنقني قصيدة تندب الحرف صام
نجود من حوض لمريرة عل دوام
الحرف جبل ثقيل الحاملو لجام
ينده الورقة تفرش محرك لكلام
الراكب شيخ و المركوب مجدوب
يصهل ف المحرك م يشدو لجام
يا راكبني يصفار وجه الشريف
ف الشخدة يكب لعمارة فلغيام
نشم ريحة الحرف بارودو صافي
به تشوف جبال الصين و لهرام
....
يا راكب دعوتي ليك كفي نهجيه
ليك كفي نهديه تشامير برشام
مطروز من عقيق لقلوب نرثيها
مزلگة ف شريط طويلو مقزام
ديرني تسبيح دوز بي لوقات
ديرني حجر سد طريق ليام
سبح بروس مغدورة ف ليل
سبح بهجالات معدودة لرقام
سبح بشعر غوفل صلع ليتام
امتى يصفى الحال يا قاريني
نشم طهر لقلوب لمعاتب يتلام
يتوب بزكاة الانسان خير وسلام
يا مداوي جرحي ف زرورة عنب
يخمرني بشريحة الوقت و ليام
دبال ربيعي زهري و عودي ولا تبن
نبغة منو تقتل الروح عام بعد عام
شكيت ليك أ شيخي حمل الحرف
تليس ومن حملو مازال م صام

الإدريسي رحال